Tumharaa Mann Dekhkar Part-12

Siddhant ne kayi jagah nayi naukri ke liye aawedan kiya,kuch jagah interview bhi diya per naukri nahi mil payi.Fir ek din Aru ne ek swasth bachche ko janam diya.Sab bahut khush the.Siddhant ki Mummy ne bachche ka naam Amaan rakha.Bachche ke janam ke 10 din baad hi Siddhant ko job mil gayi aur fir turant hi usko company ke kaam se Japan bhej diya.

Siddhant ke jaane ke baad kuch dino tak to Aru ko mahsoos nahi hua,per fir usse Siddhant ki yaad aane lagi.Wah usse call bhi nahi karta tha.Har roz apna orkut per scrapbook kholti thi per saptaah me 2 se jyaada scrap Siddhant ke nahi aate the.Apna haal chaal likhta tha,sabke baare me puchta tha,iss se jyada kuch nahi.

Teen mahine baad Aru fir se apne purane kaam per jaane lagi.Din bhar ki vyastata ke baad raat ko sone jaati to Siddhant ke sath bitaye pal yaad aate.Uska jataya pyar...uska sab kuch yaad aata.

"dekha,maine kaha tha na ki jab wah tumse door hoga,tab tumhe apne pyar ka ahsaas hoga"Aashu hans ke bola.

"tumhe lagta hai ki main pyar me hu?"

"aur nahi to kya?pyar me hone se waisa hi mahsoos hota hai jaisa tumhe ho raha hai..uski yaad aati hai...wah bechaini...wah tadap...it feels so good being in love"

"tumhe kaise pata chala bhai?"

"I am in Love...isliye pata chala"wah hans ke bola.

"Achcha..thats great! kaun hai wo special ladki?"

"mere best frend Abhishek ki sister hai,doctor hai,we r getting married"

"love marriage?"

"nahi,....ghar se arrange ho gaya hai.Actually abhishek chahta tha ki ye dosti rishtedari me badal jaye..."

"chalo achcha hai! mile ho na uss se?"

"aray buddhu,bina mile pyar hoga kya? wah yahi hai..hum aksar milte hain"

"shadi kab hogi?"

"agle saal,may be Feb mein"

"congrats brother"

"well,iss sukha sukhi badhai se kaam nahi chalega..tumhe aana padega"

"dekhti hu...I will try"

Siddhant ko January me aana tha per achanak uska ye pravas 6 mahine ke liye badh gaya.Wah Siddhant se milne ke liye apni bechaini saaf mahsoos kar rahi thi.Usne kabhi socha nahi tha ki jeevani ki koi chhoti si ghatna,jeevan ko badalne ka samarthya rakhti hai.Uss din achanak se hi to aa gaya tha Siddhant ka phone...aur usne usse milne ghar bula liya.Yah bhi ek sanyog hi tha ki Nikki chuttti me ghar gayi thi....aur fir jo hua,shayad usi ki wajah se Siddhant uski jindagi me aa gaya tha.Siddhant ke sath Aru ki shadi mein,aur Aru ke mann me uske liye prem jagane mein Aashu ka haath tha.Iske liye to wah hamesha Aashu ki aabhaari rahegi.

Aashu ki shadi Feb me ho gayi aur wah nahi ja payi.Ek mauka mila tha Aashu se milne ka per uska bhi fayda wo nahi utha payi.Badalte mausam mein bachche ki tabiyat thik nahi thi aur Siddhant bhi wapas nahi aaya tha.Aashu ab apni zindagi me vyast tha..aur Aru Siddhant ke intzar mein..

Zindagi me itna jyada sunapan,itna khalipan Aru ne kabhi mahsoos nahi kiya tha.Tab bhi nahi jab wo bilkul akeli thi.Ab to ghar per Mummy thi,Nikki thi,uska beta Amaan tha,kabhi kabhi Kavita aur Karan bhi aate the.Aru din bhar class me,bachche me busy rahti thi fir bhi usse bahut akelapan mahsoos hota thaa.Apni saari sharmo-haya tyag kar Siddhant ko scrap karti thi-'kab aaoge?"

per jab uska jawab aata tha'kyo puch rahi ho?' toh wah wapas scrap kar deti thi ki'Mummy tumhe yaad kar rahi hai' ya fir'Nikki puch rahi hai'

May ka mahina shuru ho gaya tha,Nikki ki last year k exams khatam ho gaye.Maa ke phone aane shuru ho gaye ki wah ghar aa jaye per Nikki ne koi pakka plan nahi banaya tha.

"Nimmi ki shadi ke baad tum ek baar hi ghar gayi hai isliye maa tumhe miss kar rahi hain"

"per baabu ko chhod ke jane ka mann nahi kar raha hai..."Nikki ne pyar se Amaan ke gaal choom liya.

"To tum bhi shadi kar lo Nikki,aisa hi beta godi me aa jayega"Mummy hans ke boli.

"pahle padhai,fir naukri,fir shaadi..wah bhi ahar apke jaisi saas milegi to.."Nikki boli.Tabhi door bell baji.

"main dekhti hu"Nikki darwaze ki ore badhi,"jeeja ji aap?"wah darwaza kholte hi khushi se cheekhi.Jhukhar Siddhant ka charan sparsh kiya.

"khush raho"wah muskuraya.

Aru Siddhant ko dekhte hi couch se uth khadi hui.jee kar raha tha ki uske paas ja ke use bahon me bhar le,per Mummy aur Nikki ka lihaj kar apni ichchha ko daba diya.Siddhant Mummy se mil ke sofe per baith gaya.Aru ki taraf dekha bhi nahi,yah baat usse buri lag gayi.

Chai peekar wah snan karne chala gaya aur nashta kar ke so gaya.Aru se sirf zarurat bhar hi baat hui.Aru ko ab bechaini si ho gayi.Ek-do din nahi,poore 10 mahine baad mil rahe the wo per Siddhant usse bilkul bhaw nahi de raha tha.Pahle to jab bhi wah ghar aata tha,Aru ko apne paas bulane ke liya,usko chhoone ke liye aatur rahta tha.Per iss baar wah bilkul kata kata sa tha.Kahi aisa to nahi ki wah kisi Japani Ladki se dil laga aaya ho? Aadmi ka kya bharosa?Wah waha itne dino se akela tha....stri ki kami to khalti hi hogi.Aru khana banate waqt inhi khayalo k bhanwar me khoyi thi.

"Di kya kar rahi ho? Sabji chalao nahi to jal jayegi"Nikki ne toka to wo wapas apne kitchen me aa gayi.

Siddhant so ke utha to bhi usne Aru ko apne paas nahi bulaya.Amaan ko god me le ke khelta raha,Mummy aur Nikki se baat karta raha,,sabko gifts diye,Ghar me tyohaar sa mahol tha..Aur Aru bas apni soch me hi bhatakti rahi ki Siddhant kyun badal gaya hai?

Raat me Amaan ko Mummy ne apne paas sula liya.Aru apne bedroom me ayi to dekha ki Siddhant bed per adhleta koi patrika padh raha hai.Wah uss se bina kuch bole apni nighty le ke bathroom me chali gayi.Naha ke wapas aayi to bhi usse padhta hua hi paya.

"kya baat hai?kuch hua hai kya?"aakhirkaar usne Siddhant se pucha.

"Nahi to! kuch bhi nahi hua hai"wah patrika se bina sir uthaye bola.

"to fir tum itne chup chup se kyu ho?jab se aaye ho,mujhe normally baat kyu nahi kar rahe ho?"

"I love u"Ab usne Aru ki ore dekha.

"maine ye sunne ke liye nahi kaha..main janna chahti hu ki.."

"I love u"usne Aru ki baat beech me hi kaat di.

"baar baar ek hi baat.."

"I love u"wah fir beech me hi bola.

"ok fine"Aru ne kanghi ko dressing table per rakha,"I love u too.."

"as a frend or as your husband?"usne prashn kiya,Aru muskurayi.

Uske paas aa ke bed pe baith gayi,jhuk kar uske honth choom liye

"I love u Siddhant,as my frend,as my husband and as my everything"dheere se uske kaan me whisper kiya.Siddhant ne muskurakar usse apne baaho me le liya aur paaglo ki tarah usse choomne laga.Tabhi bachche ke rone ki aawaaz aayi aur Aru jhatke se uth khadi hui.

"kya hua?"Siddhant ne hairat se pucha.

"tumhara khalnayak beta ro raha hai'kahkar wo tezi se room se bahar nikal gayi per turant wapas bhi aa gayi.

"itni jaldi aa gayi?'

"haan,tumhare khalnayak bete ko meri achchi Mummy ne chup kara ke wapas sula diya hai"

"ye baar baar mere bete ko khalnayak kyu kah rahi ho?"

"Tum bhi Aashu ko khalnayak kahte the,jab wo aise mauko per disturb karta tha"

"wah kya tumhara koi bloodline ka relative hai jo tum itna chidh rahi ho?"

"wah mera frend hai..."

"pata nahi kaise wo tumhari baato ko jhelta hai!!"

"kyonki he is a very nice guy"

"mujhse bhi jyada...??"

"nahi!"wah uske paas aa gayi,"tumse jyada achcha to koi bhi nahi hai meri duniya mein.."usne is bahas ko viraam diya.Aur Siddhant ne usse usi pyar bhari nazro se dekha jinke liye Aru itne mahino se tarah gayi thi.

Sone se pahle dono me baat ho rahi thi.

"tum meri Mummy ke samne yahi low neck aur knee length ki nighty aur baaki kapde pahanti ho?"

"haan"

"kyon?Saas ke samne sharm nahi aati?"

"wah meri bhi to Mummy hain"

"kal se tum saaree pahnogi....maathe per aanchal rakhogi"

"bilkul nahi"

"kaisi patni ho tum Arunima Singh?Pati ki aagya ka paalan karna to door,saaf jawab de rahi ho ki nahi karogi"

"achcha theek hai pahan lungi....ek baat bataoge"wah bed per uth ke baith gayi

"puchho na"

"sach batana"

"pucho to"

"ek adarsh bharatiye ladki waale koi bhi gunn mujhme nahi the,main tumhare layak,tumhare jitni sundar bhi nahi hu,fir kya sochkar,kya dekhkar tumne mujhe shaadi ke liye propose kiya?"

"kuch khaas nahi....sirf tumharaa mann dekhkar.."wah muskuraya aur Aru ko apne kareeb kheench liya,Aru ne bedswitch se batti bujha di!!

THE END

 

Tumharaa Mann Dekhkar Part-11

"Aru main kal ja rahi hu to socha ki tumse wo baat karu jiske liye mainly main yahan ayi thi"Amu ne kaha to wah prashnsuchak drishti se usse dekhne lagi.
"Bharat lautne ke baad Siddhant aur tumse milne ki meri ichchha thi.Jab main settle ho gayi,Lav ka admission kara diya,tab maine tumhare pas aane ki sochi.Mann me yah ummeed thi ki tumhe kahi pata ho ki Siddhant kahan hai?kya kar raha hai?Uski shadi hui ya nahi?Halanki itne saal beet chuke the....mann mein darr bhi tha ki agar tumse uska pata na mila toh?Mere mann me ek halki si aasha thi ki shayad wo abhi bhi....main usme apna sahara dhundhna chahti thi.Per  yahan aakar pata chala ki tum uski wife ho...Mere khud ka ghar basne se pahle hi ujad gaya..isiliye main khud kisi ka ghar nahi tod sakti"
"tum abhi bhi uss se pyar karti ho na.."Aru ko kuch jalan si hui.
"pahle pyar ko koi nahi bhool sakta.Khair! ab  mere liye Lav se important duniya mein koi nahi hai...toh ab hume ye sab purani baate bhool hi jana chahiye..yahi achcha rahega.Tum apni family mein khush raho aur main apne Lav ke sath.."

Siddhant Dilli jaane se pahle Mummy ko Aru ke paas le aaya.Aru ne ek kamra unke liye alag se saja rakha tha.Kavita apne pati ke sath chali gayi.Mummy ne aate hi Aru ke khaan-paan ka jimma le liya.Nikki kuch khilane aati thi to Aru nakhra karti thi,per saas ka diya wah sab kuch chup chap kha leti thi.Dheere dheere uska swasthya achcha ho gaya.Siddhant ne usse kaha ki ab to padhana chhod de,per Aru ne inkaar kar diya,boli jab tak kar sakti hai kaam karegi.

Ek shaam ghar pahuchi to Saasu maa ne usse juice ka glass pesh kiya.Aru sakucha gayi.
"Mummy aap roz roz mere liye itna kaam karti hain,mujhe achcha nahi lagta"wah boli.
"kyun?achcha kyun nahi lagta"wah muskurayin
"Bahu ka farz saas ki sewa karna hota hai,na ki apni sewa karwana"Aru bhi muskurayi,"aur main kalyug ki bahu,apki sewa karna to door,chupchap baithe baithe kha rahi hu"
"tum bhale hi mujhe apni saas manti ho beta,per main tumhe utna hi manti hu jaise apne dono bachcho ko...Mere liye mere sabhi bachche ek samaan hain.Main janti hu main tumhari maa ki jagah nahi le sakti per tum meri beti ho ye main manti hu,dil se"
"Mummy!"Aru bhawuk ho gayi,juice ka glass table per rakh,saas ke gale lag gayi.
"tum jaise chaho waise yahan raho,mere samne ye lihaaj karne ki zarurat nahi ki main tumhari saas hu..main Kavita ko bhi anawashyak nahi rokti tokti.."
"Haye! kash ki mujhe bhi apke jaisi saas mile Aunti"Nikki ne kaha aur teeno hans padi..

November mein Nimmi ki shadi ke liye Nikki ghar chali gayi.Maa ne ek baar Aru ko bhi bulaya per kaam ka bahana kar ke usne mana kar diya to fir dubara unhone agrah bhi nahi kiya.Nimmi ki shadi mein jaane ka mann to usse bhi tha per Siddhant aane wala tha,aur fir ab uska pet dikhne laga tha,Chunki ghar me kisi ko pata nahi tha isliye wo Nimmi ki shadi me vyawadhan bann ke nahi jana chahti thi.
                Unhi dino wo class ke baad Siddhant ke sath ghar aa rahi thi to achanak Tauji mil gaye,Siddhant ka parichay diya usne aur dono ne unka ashirwad diya.
"Ghar chalo Aru,Taayi se bhi mil lena"Tauji bole to Aru ne Siddhant ko dekha,usne aankho se haami bhari.
"kya?? tumne bina kisi ko bataye shadi kar li?wah bhi apne jaat se bahar??"Tayi kuch rosh se boli to Aru roaansi ho gayi.
"To kya karti bechari?ek gair jimmedar baap ki beti,jo akeli itne dino se hai,uske kadam kahi galat jagah nahi bahke,yeh nahi dekh rahi ho?Main nahi manta ki isne kuch galat kiya hai,aur fir badi se pahle chhoti ka byah karna bhi to thik nahi tha.Tum ye sab nahi socho,khush mann se beti-damad ka swagat karo..inki achchi khatirdari karo"Tauji ne uska paksh liye to usse bahut khushi mahsoos hui.Tauji Siddhant se baat kar ke santusht the ki ladka achcha hai.

Nimmi ki shadi ke dus din beetne per bhi jab Nikki wapas nahi aayi tab Aru ne usse phone kiya.
"Di maa nahi chahti hain ki main apke pas wapas jaun isliye main nahi aa rahi hu"Nikki udas ho ke boli.
"kyon?nahi aaogi to padhai adhuri rah jayegi"
"Tayi ji apki shadi ka raaz yaha khol diya hai.bas fir kya tha,pahle meri peshi hui.maa mujhper bahut naraz hui ki jab main sab janti thi to unse kaha kyu nahi?"
"yah bhi kaha hoga ki main tumhe bigad rahi hu"
"exactly! yahi kaha,fir boli ki meri padhai likhayi ab se band kyunki agar main apke sath rahi to apki hi tarah koi na koi "gul" zarur khila dungi."
"ab? ab kya hoga?"
"hoga kya? din me do trip unke sath bahas ho rahi hai.meri unse jang tab tak jaari rahegi jab tak main wapas nahi aa jati.mere career k sath maa khilwaad nahi kar sakti"
"aur Papa?unhone kya kaha?mere baare me kuch..."
"kuch bhi nahi!iss poore prakaran me Papa ek shabd bhi nahi bole.Khair! main jaldi aane ki koshish karungi.koi aa raha hai Di,main phone rakhti hu"
                                                                                Aaj Aru ko yakin ho gaya ki Papa ke jivan me,unke mann me uske liye bilkul bhi jagah nahi hai..wah kya karti hai,kya nahi,iss se bhi koi fark nahi padta unhe!wah naraz bhi hote to Aru ko khushi hoti per..."Aru ro padi.

Raat me Siddhant ko phone kar ke ye sab kaha.
"aaj main bahut thak gaya hu Arunima,kal baat kare...plz"Siddhant ne thake swar me kaha to wah chidh gayi.
"meri hi galati hai,I am sorry,mujhe pahle hi tumko nahi Aashu ko call karna chahiye tha!"Gusse me bolkar usne line kaat diya.
Fir turant Aashu ko call kiya aur pahle gusse se,fir rote huye saari baatein batayi.
"Aur Siddhant! I just hate him"
"kyun? usne kya kiya hai?"
"ek din mujhse jhagad pada ki main usse na batakar tumse kyu baate share karti hu.Aur aaj jab maine call kiya to usne meri baat hi nahi suni.kaha ki thaka hua hai,kal baat karega....mujhe aaj baat karni hai aur wo kal karega?"
"Listen sis! tum bekar hi apna gussa usper nikal rahi ho,just chill.Private company me kaam ka load bahut rahta hai.Koi sarkaari naukri to hai nahi ki work load fix rahega,ya fir kaam kiya na kiya job per koi khatra nhi.waha to best perfomance dena hota hai tabhi job bachi rahti hai..tum samajhne ki koshish kyon nahi karti?"
"Main jaanti hu"wah thake swar me boli.
"janti ho to fir naraz kyu hoti ho?"
"pata nahi main kyu naraz ho gayi?Mera mood ajkal sahi nahi rahta.Khair chhodo! Nikki ke liye kya karu? maa ko call karu?"
"unko call karna hai to bura bhala sunne ko taiyar rahna.fir tumko dukh hoga.main nahi chahta inn dino tum dukhi raho.ek kaam karo Papa ko call karo,wo kuch nahi bolenge tumko aur tum apni bat bhi unke aage rakh paogi.per dekho sis,jyada tension nahi lo.At the end of the day wo unki beti hai,tumhari nahi"
"shayad tum thik kah rahe ho"
"shayad nahi sis,I m always right"
"thanx"
"kyon?"
"hamesha meri baat sunne ke liye...yah nahi kahne ke liye ki hum kal baat karenge"
"tum Siddhant ko apna maanogi to tumko meri zarurat nahi hogi...per anyways thanx"
"kyon?"
"mujhper vishwas karne ke liye...ek bat aur kahunga"
"kaho na?"
"jab tak main single hu,koi problm nahi hai..per shadi ke baad agar meri wife ko pasand nahi aaya tab kuch mushkil hogi.."
"main samajhti hu"

Aashu se baat karne ke baad mood halka hua to wapas Siddhant ko call kiya.
"main tum per bina wajah naraz hui..mujhe waise nahi bolna chahiye tha..mujhe maaf kar do"
"even I m sorry,mujhe tumhari baat sunni chahiye thi"
"nahi tum sorry kyu bol rahe ho?tumper work pressure rahta hai,mujhe samajhna chahiye tha"
"lagta hai Aashu se tumhari baat ho gayi hai"
"tumhe nahi pasand hai to nahi karungi kabhi"
"aray re aisa mat karna.warna hamara divorce ho jayega"
"kya?"
"kyunki agar hum kabhi jhagde to tumhe samjhane wala koi nahi rahega,fir bat bigadti chali jayegi and nateeja-divorce''
"iss khushfahmi me mat rahna tum...chahe jo ho,main tumhara picha kabhi nahi chhodne wali,itna samajh lo"wah bhi hans di.

Agle din papa ko phone kiya aur 2 din baad Nikki aa gayi.Din guzarte gaye.Aathwe mahine me Aru ne kuch samay ke liye kaam chhod diya.Siddhant per kaam ka bojh badh gaya tha,phone per wo aksar pareshan hi lagta tha.Aur achanak ek din wo Patna aa gaya.wah naukri chhod ke aaya tha.
"mere boss ki wife ki wajah se maine resign kiya" uske akele me Aru ko bataya.
"kyu?kya kiya usne?"
"wah mujhe use karna chahti thi"
"matlab?"
"matlab ye ki wo mere sath relation chahti thi...physical relation"
"kya?"
"mana karne per mera promotion rukwa diya"
"tumhara boss budha hai kya?"
"nahi,infact wo to handsome hi hai..per Ayesha ne kaha ki wo usse satisfy nahi kar pata hai"
"chhi!! maine kabhi socha nahi tha ki tum kisi se aisi baat karoge"
"Ae hello,main Ayesha se baat karne nahi gaya tha...usne khud ek raat mujhe call kiya aur ye sab bakwas kiya"
"tumne phone off kyu nahi kiya?"wo kuch rosh se boli.
"you r jealous.tum maano na maano Arunima Singh per tum mujhse pyar karti ho."
"nahi....waise karti hu,just as a frend" wah muskura di.




END OF PART-11



 

Tumharaa Mann Dekhkar Part-10

Ek subah Siddhant ne phone kiya.
"Tum kab aaoge?"Aru ne pucha kyunki wo chahti thi uske aane se pahle Amu chali jaye.
"Ab to agle mahine hi possible hoga aana.Tumhari tabiyat thik rahti hai na?"
"haan,pahle se better hoon"
"kya kar rahi thi abhi?"
"nashta kar rahi hu"
"thik hai fir...see u soon"wah hansa aur fir line kaat diya.
Tabhi darwaaje ki bell baji.Aru uthi aur darwaja khola.
"tum?" Siddhant ko dekh ker wo sann thi.
"surprise"
"tumne to kaha tha ki tum next month ......fir tum abhi kaise,,....?"
"tum ghabra kyun rahi ho?kahi bedroom me kisi ko chhupa toh nahi rakha hai tumne?"wah mazak mein bola.
"nahi! nahi to..."wah aur bhi sakpaka si gayi.
                                                                        Tabhi Amu kitchen se nikli.."ye lo tumhara orange..."wo siddhant ko dekhkar chup ho gayi aur juice ka glass table per rakh diya.
"tum..yahan?"Siddhant usse dekhkar chaunk gaya.fir turant gusse se Aru ko dekha.
"to isiliye tum mujhe dekh k khush nahi hui thi Arunima?"
"nahi aisi baat nahi hai..."
"pahle apni pregnancy ki bat mujhse khud nahi kahi,fir Amrita ke aane ki baat chhupai..aur kitni baate tum mujhse chhupati aayi ho Arunima?"wah daant peeskar bola.
"main tumse kuch bhi chupana nahi chahti thi"
"fir batati kyu nahi ho?Abhi maine call kiya to bataya kyu nahi ki Amrita yahan hai??"
"maine socha ki baad mein..jab hum milenge tab...."
"bahane tumhare paas kayi hain...aur main tumhari ye nahi batane aur baad me batane wali aadat se pareshan hu...kitne dino se hai ye yahan?"
"jis din tum gaye the usi din se....dus din.."
"kahi hamesha ke liye to nahi rakh rahi ho isse? Aur jo furniture tum banwa rahi ho wo bhi kahi iske liye to nahi??"
"nahi wo to mummy ke liye..maine socha wo yahi rahe to achcha hoga'
"per jab tak Amrita yahan rahegi,main nahi rahunga! main ja raha hu!"kahkar usne bag uthaya to Aru ne uski baanh pakad li
"ruko na...."per Siddhant ne uska hath jhatak diya
"mat chhuo mujhe! safar se aaya hu na,kitne germs meri body per honge,chhodo mujhe"wah chidh kar bola.Pahle ek-do baar Dilli se aate hi jab Siddhant ne Aru ko baahon me lene ki koshish ki thi to wo yahi kahkar alag ho jati thi.Uske paas tabhi aati thi jab wo naha-dho leta tha.Aaj uski isi baat ko Siddhant ne Aru ke upar ulat diya tha.wah pukarti rah gayi per wah chala gaya.

Aru kuch kamzori sa mahsoos karne lagi aur aa ke couch per let gayi.Mann rone rone ho aaya.
"Mujhe maaf kar do Aru,meri wajah se tum dono me jhagda ho gaya"Amu andar se aa ke boli.
"nahi galati meri hi hai,mujhe bata dena chahiye tha usse"
"main kal chali jaungi Aru,tum usse phone kar ke mana lo"
"wah jyada der mujhse naraz nahi rah sakta ,ye main janti hu.wo khud wapas aa jayega"Aru ne vishwas se kaha.
"wah waapas aa hi jayega ,kyunki usko tumhari zarurat hai"
"nahi! wah wapas isliye ayega kyu ki wo janta hai ki mujhe uski kitni zarurat hai!"

Kahne ko to Aru ne kah diya per Siddhant ko itne gusse me pahli baar dekh rahi thi.Kitni bar apna mobile uthaya usne ki call kar k Siddhant se mafi mang le,usse mana le..per usse pata tha ki abhi call karegi to wo aur jyada gussa hoga.Computer class me bhi mann nahi laga uska.Shaam ko ghar ayi toh sharirik aur mansik roop se thak kar past thi.
"Di,aaj collge se nikalte hi Jeejaji mile the.Office ke kisi kaam se aaye hain dus dino ke liye.Maine socha yaha honge per Amu Di ne kaha ki wo apne ghar pe hain.Yaha nahi aaye the kya?"Nikki ne pucha.
"Aya tha per ghar jana zaruri tha"Aru thake swar me boli.

Raat mein Aru ne khud hi Siddhant ko phone kiya.
"bolo?"udhar se Siddhant ka rusht swar saaf sunai diya.
"I am so sorry,plz iss baar maaf kar do.Aage se tumhe sab kuch bataungi...jo bhi hoga sab bataungi...forgive me this time."
"tum mujhper abhi bhi vishwas nahi karti na?Sach kahna,tumne mujhe Amrita ke baare mein isiliye na nahi bataya kyunki..."
"Aashu ne kaha ki main tumhare samne Amrita ka naam na loon"wah Siddhant ki bat kaat kar boli.
"O Aashu!! main to bhool hi gaya tha ki tum sirf usi ke bataye raste per chalti ho..kya main jaan sakta hu ki ye nek salah usne kyu di tumhe?"Siddhant Ashu ka naam sunn chidh gaya.
"usne kaha ki tumhe Amrita ke baare me bata ke main apne pairo pe khud hi kulhari maar rahi hu..usne mana kar diya warna main to tumhari shadi Amu se karwana chahti thi"
"Amrita ke sath meri shadi?"wah hans diya,"tumhare jaisi Arabo me ek patni mujhe dusri nahi mil sakti Aru! aisi patni jo apne pati ki dusri shadi chahti hai...tum pagal ho...! Waise Ashu bahut samajhdar ladka hai,kash! tumhari soch uske jaisi hoti ya fir main uska pati hota"Siddhant bola to Aru hans di,Naarazgi khatam ho chuki thi.
"Aur ek baat kaan kholkar sunn lo tum,tum mujhse pyar karo na karo,per agalr agli baar se tumne meri shadi karane ki sochi to mujhse bura koi nahi hoga.Waise tumne 2 already married logo ki shadi ki sochi bhi kaise?"
"aao to bataungi...sorry abhi batati hu..Amu ka divorce ho gaya hai! ek beta hai.."
"aur tumne socha ki main usse aur uske bete ko apna lunga? ji nahi,main itna bhi dayawan nahi hu Arunima singh ki apni wife aur bachche ko chhodkar,kisi aur ki wife aur bachche ko apna loon! samajhi aap?"
"samajh gayi"
"amrita tumhari bahan hai,mujhe uss se koi problm nahi hai.Aaj main usse dekhkar itna hyper kyu ho gaya mujhe nahi pata! Tum per gussa aya ki mujhe kuch batati nahi ho! waise apni har baat Ashu se kahti ho,mujhse nahi,aisa kyun?"
"kyunki itne saalo me mujhe uss se apni sari baate share karne ki aadat ho gayi hai.Tumse kuch kahne se mujhe aaj bhi kuch sankoch sa mahsoos hota hai,per usse kabhi dekha nhi shayad isiliye hesitation nahi hoti..Main tumhe khush dekhna chahti hu Siddhant isliye agar tumhare mann mein Amu ke liye.."
"Silly girl! Ab bas karo!"usne Aru ki baat beech me hi kaat di
"tum mere sath khush to ho na?I mean..tumhe itni bhaag daud karni padti hai,kabhi yaha kabhi waha...hum regularly sath nahi rah paate isliye..."
"mujhe koi problem nahi hai! waise kal sunday hai to main aa raha hu tumhare paas! monday se to fir office ka kaam shuru ho jayega"
"kal subah Amrita chali jayegi"
"wah rahe to bhi mujhe fark nahi padta"
                                                               Ganimat thi pahli ladai ki sulah ek hi din mein ho gayi thi,Aru ne socha!



END OF PART-10

 

Tumharaa Mann Dekhkar Part-9

   Der raat tak Aru Amu se baat karti rahi.Itne saalo mein kya kya hua sab bataya usne Amu ko.
"Siddhant se tumne shadi kyu ki Aru?"
"wah chahta tha isliye...aur fir main kab tak kunwari rahti?"
"Tumhe yaad hai Aru maine ek baar tumse kaha tha ki mujhe ascharya hota hai ki kaise tumko Siddhant se pyar nahi hua?"
"haan,yaad hai"
"aur tab tumne kaha tha ki wah sirf tumhara dost hai..per dekho pyar to tab bhi tha tum dono me,aur ab bhi hai...tabhi to aaj tum dono sath hi"Amu muskurayi per aankho mein aansu jhilmila uthey.
"Amu kya tum aaj bhi...?? tum ab married ho,tumhe ab kisi aur ke baare mein nahi sochna chahiye..."yah sochkar ki Amu aj bhi Siddhant ko chahti hai,Aru kuch anmani si ho gayi.
"mera divorce ho gaya hai"
"kya? kab? ye kaise ho gaya Amu?"Aru chaunk gayi.
"videsh mein basa ladka babuji ko bahut pasand aaya tha.Main Siddhant ke liye roti rah gayi aur unhone meri chat mangni pat byaah kara diya.Apni ore se to unhone meri bhalai hi sochi thi,per unhe kya pata tha Aru ki apni iklauti beti ko wo jis Rohit Trivedi ki ardhangini bana America bhej rahe hain,wah wahan uski naukrani ki haisiyat se ja rahi hai.Rohit ki firangan patni Ruth wahan pahle se hi maujood thi"
"wah pahle se married the,fir tumse kyu shadi ki unhone?"
"Ruth ki sewa karane ke liye! wah pregnant thi aur tum to janti hi ho,foreign mein yahan ki tarah sewa-tahal ke liye aaya nahi milti.yahi mukhya karan tha iss shadi ka.Dusra karan ye tha ki mere saas sasur bharatiye bahu hi chahte the"
"apne swarth ke liye unhone tumhari zindagi barbad kar di?/ye to bahut galat baat hai! tum kaise rahti thi waha?"
"Jaate hi mujhe pata chal gaya ki Rohit ne Ruth se vaada kiya tha ki iss baar wo India se uske liye maid le ke ayega.aur usi maid ke roop me usne mera parichay Ruth se karwaya.Main ye dekh ke hairan thi.Jab wastwikta se rubaroo hui to mann me pahla khayal yahi aaya ki agar aaj main Siddhant ki wife hoti to aisa hargiz nahi hota! Florida ja kar to main fans gayi thi Aru.Kya karti? Ruth ki sewa,ghar ka sara kaam,safaai,sab karti thi main.Waise to Ruth achche swabhaw ki thi per kabhi kabhi maalkin hone ka ahsaas kara hi deti thi.Main waha un logo se alag thalag si rahti thi,basement me sona padta tha mujhe.Rohit ne mujhe kabhi apni patni ki drishti se dekha hi nahi.Jab Ruth ne bachchi ko janam diya tab mera kaam aur badh gaya.Raat ko thak-haarkar jab sone jaati thi to neend kam,apni kismat per rona jyada aata tha.Mere dukh ko samajhne wala uss ajnabi desh me koi nahi tha,jiska haath tham main pardes aayi thi wo bhi to mera nahi tha.Ek raat baby ko sulakar jab main aone basement me sone aayi to kisi aur ke hone ka aabhaas hua.Light on kiya to dekha Rohit mere bed pe baitha drink kar raha hai.Mujhe dekhkar kaha-'darwaza band karo'...mujhe dahshat si ho gayi,main chupchap khadi rahi to usne fir apni baat dohrayi.Kaanpte haatho maine darwaza lock kiya.wah bed se uthkar mere paas aya aur jabardasti karne laga.Maine virodh kiya to bola agar maine inkaar kiya to abhi usi waqt mujhe ghar se nikal dega.Main darr gayi,kyunki main waha kisi ko nahi janti thi..main utni raat me kaha jati?Mujhe idea nahi tha ki main kis se madad mangu?chup rahne ke alawa mere paas aur koi rasta nahi tha aur pati hone ke bawjood usne meri izzat ko taar taar kar diya.Aisa kayi dino tak chalta raha..Ruth office chali jati thi aur Rohit jab na tab apne mann ki karta tha.Bachche ki wajah se 3-4 mahino se uske sambandh Ruth se nahi the,shayad isiliye tab tak mujhe use kiya usne jab tak Ruth fir se uske sath sone ke liye taiyar na ho gayi.Per tab tak main khud pregnant ho gayi.Maine bachche ko janam dene ka nirnay liya,bhale hi uske baap se mujhe nafrat thi.Ye baat maine Rohit ya Ruth ko nahi batayi,Unhe pata tab chala jab mera pet pata chalne layak nkal gaya tha.Rohit mujhe abortion ke liye le gaya per 6 mahine ho chuke the isliye doctor ne inkaar kar diya."
"Rohit ne bachche ko sweekara to hoga na?"
"nahi,ulta usne Ruth se kah diya tha ki na jaane main kiska bachcha pet me liye ghoom rahi hu"
"Tumne Ruth se kaha kyu nahi ki bachcha Rohit ka hai?"
"Ruth puchti bahut thi per main kuch na kah payi kyunki Rohit mujhe ghar se nikal deta"
"Mamaji se phone kar k kyu nahi kaha ye sab?"
"Rohit phone lock rakhta tha,agar babuji ka phone kabhi aata to wo paas khade hokar unse meri baat karwata tha aur mujhe kahna hota tha ki main thik hu aur khush hu"
"to tumne bachche ko janam kahan diya? wahi?"
"haan!Ruth mujhper apne kaam ke liye dependent thi aur uski baby bhi mujhse ghuli hui thi isliye Ruth mujhe hatana nahi chahti thi...Din aise hi guzar rahe the.Rohit aur Ruth kaam per chale jaate the aur main ghar per akeli din bhar dono bachcho ko dekhti thi"
"Fir tum yahan wapas kaise aa gayi?"
"last year Baby Ann ko ruth ne boarding school me daal diya..ab mere liye waha koi khaas kaam nahi tha isliye usi ne mujhe india bhejne ka arrangement kar diya,tickets bhi arrange kar diye.Mera mann khush ho gaya.Waha saat saalo se thi per fir bhi apne desh wapas jaungi ye khayal mujhe excite kar raha tha.Per yahan aane se pahle ek kaam aur karna tha mujhe aur wo maine kiya,Ruth ko sab kuch bata diya"
"tumne bata diya?usne kya kaha?naraaz hui hoga?"
"nahi,wo udas hui aur boli wo sab janti hai"
"janti thi to kuch kaha kyu nahi pahle?"
"wah Rohit se pyar karti thi isliye anjaan bani rahi.Pyar manushya se kya kya nahi karwata hai!Ruth ko meri halat per afsos tha,uska kahna tha ki jab tak usse ye pata chala tab tak Lav ka janam ho chuka tha...per ab wah mujhe iss nark se aazadi de rahi hai...isiliye mujhe India bhej rahi hai taaki main apni baaki zindagi sukh se jee saku.Bas main aa gayi aur kuch dino me divorce bhi mil gaya"
"Abhi kaha rahti ho?Mamaji ke paas hi??"
"haan,babuji ke paas hi hu,aur kahan jaungi,ek boutique khol liya hai...zindagi chal rahi hai"
"aur tumhara beta Lav?wo kahan hai? usse nahi layi tum yahan/"
"usse padhne ke kiye Dilli ke ek boarding school me rakh diya hai.Janti ho Aru,Babuji aaj bhi dukhi rahte hain ki unki wajah se meri life kharab hui per mujhe lagta hai unki koi galati nahi,,,,kismat me jo likha hota hai wahi hota hai.."Amu ne apni aankhe pochhi aur karwat le ke sone ka upkram karne lagi.
        Per Aru ko raat bhar neend nahi ayi.Wah Amu ke baare mein sochkar pareshan thi.Aajtak use yahi lagta tha ki wahi sabse jyada dukhi hai,bhagwan ne uske sath hi anyay kiya hai per Amu ke sath jo kuch bhi hua uske aage uska apna dukh,apna ghum kuch hai ki nahi! Mann me kuch dukh,kuch asantosh awashya tha per wah comparatively sukhad jindagi hi ji rahi thi.Per itni sundar susheel Amu ke sath yah anyay kyu hua?Fir usne ek thos nirnay liya.

"Tumne Amrita ko apne ghar rakha hai?Tum pagal ho gayi ho?"
"wah meri cousin hai,mujhse milne aayi hai to main usse kahan bhaga deti?"
"per ab tum married ho,apne husband ke ex-flame ko tumne kaise apne ghar mein....Siddhant ko pata chalega to??"Aashu ne pucha.
"to kya?maine decide kar liya hai Aashu,main Siddhant ko Amu ke baare me bataungi aur agar wah chahega to main usse divorce de dungi taki wo Amu se shadi kar le.."
"you know what sis? u are totally main!! tum kyon apne pair per khud ki kulhaadi maar rahi ho?"
"Amu ne ab tak bahut kuch saha hai Aashu! Aur fir Siddhant bhi to uss se kitna pyaar karta tha.Main to hamesha uski khushi chahti hu."
"tum bahut badi galati karne ja rahi ho! iss baar bina mange advise de raha hu,isse manogi to tumhara ahsaanmand rahunga main"Aashu seriously bola.
"kya?"
"tum apne ko Siddhant ki dost nahi,uski patni ke room me imagine kar ke dekho,kya tum uska kisi aur ke sath affair bardasht kar sakti ho tum?"
"nahi"
"Iska matlab ye hai ki kahi na kahi tum uss se pyar karti ho...bas uss pyar ka ahsaas tumko nahi ho raha hai...Shayad is liye ki Siddhant kabhi tumse door nahi jata hai,tumko ignore nahi karta hai..hamesha contact me rahta hai,...hamesha jhuka rahta hai tumhare aage...per iska matlab ye nahi hai ki tum usse aur jyada jhukao"
"to kya karoon? main usse khush dekhna chahti hu"

"tum usse ye sab nahi bataogi.Amrita ka naam bhi uske aage mat lena..per agar wo kabhi khud puche to jhooth bhi nahi bolna...aur bhool kar bhi Amrita se uski shadi ki baat na karna"
"iss se kya hoga?"
"iss se jo bhi hoga wah tumhare liye achcha hi hoga,that i assure u!"

Amu uske ghar kuch dino ke liye ruk gayi thi,wahi koi workshop tha usme jane ke liye hi wo patna aayi thi.Siddhant har raat Aru ko phone karta per Aashu ki baat dhyan me rakhte huye Amu ka zikra usne kabhi nahi kiya.



END OF PART-9
 

Tumharaa Mann Dekhkar Part-8

Dilli jaane se pahle Siddhant Aru ke ghar aaya.
"Aray ye tumko kya ho gaya hai Arunima?? Tum abhi bhi bimar ho kya?"Aru pahle se jyada dubli aur kaali si lag rahi thi,ekdum kamzor aur beemar! Yah dekhkar Siddhant chintit ho gaya.
"chalo na,kisi achche doctor se tumhara checkup kara doon.Tum zarur beemar ho aur mujhe inform nahi kiya tumne"
"Di beemar nahi hain jeeja ji,aap daddy banne wale hain"Nikki ne bataya to wah khush ho gaya.
"Tumne mujhe bataya nahi Aru?"Siddhant ne pyar se Aru ki ore dekha.
"Aap log baatein kijiye,mujhe college ke liye der ho rahi hai"kahti Nikki ne apna bag uthaya aur chal di.
"Mere paas aao Aru"Siddhant ki iss baat ki awhelna wah kabhi nahi karti thi,aakar uske bagal mein baith gayi Aru.
"main roz call karta hu,per tumne mujhe ye baat batayi hi nahi,kyun?"
"mujhe kuch dino pahle pata chala..jab papa....main uss mauke per tumse kaise kahti?Waise maine socha tha ki agle mahine kahungi,per Nikki ke pet me koi baat pachti hi nahi"
"Mummy ko pata chalega toh wo bahut khush hongi!Unhe iss khabar ka bahut dino se intzaar tha"
"Mummy tumhare sath Dilli ja to rahi hain na...?"
"Nahi! Abhi kuch din Kavita yahan rahegi,uske jaane ke baad hi Mummy jayengi.Gaon wale ghar me wo akele nahi rah sakti aur main ab unhe akele chhodunga bhi nahi.Mujhe abhi bhi vishwas nahi ho raha hai ki Papa ab nahi hain.Sab kuch itna unexpectedly hua ki main antim samay me unke paas bhi nahi tha.Itni baar kaha ki ek baar delhi aa ke check up kara le per kabhi kaam ka bahana...kabhi kavita ki shadi ka bahana...Papa ne meri baat hi nahi maani..."Kahte huye Siddhant ki aankhe bhar aayi.Aru chupchap uska hath pakde baithi rahi.Kuch der baad wo samanya ho gaya.
"Aur tumhare mann me ye vichar kaise aaya ki main tumhe chhod dunga?Tumhe kabhi chhodne ke baare me soch bhi nahi sakta..I love u Aru"
"I love u Siddhant as my frend"
"come on Aru,pregnant hone ke baad bhi,just as a frend?Tum abhi bhi mujhse pyar nahi karti,hai na?"
"Main tumhe ek dost se jyada kuch aur soch hi nahi pati..."
"Kabhi mujhse pyar ho gaya to mujhse kahogi na?"
"Kahungi nahi,jis din main khud tumhare paas aungi,bin bulaye,uss din samajh jana ki main tumse pyar karti hu"
"Aisa hoga na ek din..?"
"ho sakta hai"Aru muskura di.Siddhant ne usse gale se lagaya ki achanak Aru ka mobile ring kiya.
"Ye to definitely tumhara khalnayak bhai ho hoga"Siddhant bola
"haan wahi hai"Aru ne mobile screen per dekh k kaha
"pata nahi ye kaise smell kar leta hai ki hum sath hain"

                                                                                        Shaam ki train se Siddhant ko jana tha,Aru bhi uske sath station pahuchi.Hanuman mandir me darshan karna tha usse.Jab wo wapas lautne lagi to ek jana pahchana chehra dikhayi diya usse.
"Amu.."wah chillayi to Amrita ne palatkar dekha usse.Aru ko dekhkar wah khushi se muskurayi aur uske paas aa gayi.
"Aru"Amu uske gale lag gayi.
"Tum yahan Amu?Maine socha tha ki tum Jeeja ji ke sath America me hogi..Chutti manane aayi thi kya?"
"Saari baatein yahi karogi kya?"
"Aray nahi Amu,tum ghar chalo...mere apne ghar.."
"babuji se tumhara pata leke tumhi se milne aayi hu Aru,chalo.."
                                                                                                              Fir Aru usse ghar le aayi.Apne kamre me hi Amu ka samaan rakha.
"Ye Siddhant ki tasveer hai na Aru?"Deewar pe lagi tasveer dekh ke Amu chaunk gayi,"tumne Siddhant se shadi ki hai Aru? Kab?mujhe to pata hi nahi chala"
"Kisi ko bhi pata nahi hai.Per pahle tum fresh ho k aao,kuch kha pi lo,aaraam kar lo..baatein to hoti hi rahengi."




END OF PART-8

Tumharaa Mann Dekhkar Part-7

    Aru ki shadi ko dus din beet gaye the.Siddhant wapas Dilli chala gaya tha.Uske ghar Kavita ki shadi ki taiyyari chal rahi thi.Aur wah fir shadi ke liye kuch hi dino me ghar aane wala tha.Itne dino mein Aashu se bhi uski baat nahi hui thi so ek din fursat se usne Aashu ko ring kiya.
"sab thik to hai na?"Aashu ne pucha.
"Haan"
"tum khush to ho na?"
"Khushi to nahi...per haan,secure mahsoos kar rahi hu"
"Khush kyu nahi ho?"
"frend ko husband sweekarne me kuch waqt to lagega na? Mujhse ye sochkar khush raha hi nahi jata ki Siddhant,mera dost mera pati hai"
"ek baat kahu?"
"kaho"
"Khush rahne ke liye zaruri hai adjust karna.Agar tum apni paristhiti se samjhauta kar leti ho to tum khush rahogi kyunki jo hai,wah badal nahi sakta.Tumhare paas jo hai,jitna hai,tumhe utne mein hi apni khushi talash karni chahiye.Asantusht rahne se khushi nahi milti hai.Tum zindagi ke prati apna nazariya badlo,zindagi khud hi badal jayegi.Achche nazar se dekhogi to achchi aur bure nazar se dekhogi to buri ho jayegi"
"tum thik kah rahe ho"
"you know I am always right.Waise jeeja ji hain kahan? Patna ya Dilli?"
"abhi Dilli me hai,Kavita ki shadi me ayega"
"wah wahan aur tum yahan?"
"haan,jab tak Nikki ki padhai khatam nahi ho jati,main yahi rahungi.Uske baad jab Nikki ka admission MBA mein ho jayega tab main Siddhant ke pas chali jaungi,aisa socha hai maine"
"Aur Siddhant kya chahta hai?"
"Pata nahi,maine uss se pucha hi nahi,bas apna faisla suna diya to wah maan gaya"
"ye to galat baat hai.Aage se akele koi faisla mat lena.Pahle usse vichar-vimarsh zarur kar lena.Waise ek baat to zarur hai,tumhare parents ne koi punya hi kiya tha jo tumhara janam unke ghar hua"
"Aur maine koi paap....Khair chhodo! main kitna bhi achcha kaam karu,kuch bhi kar loon,per Papa na pahle mujhe dil se beti maante the,na bhavishya me manenge!Kitna achcha hota na Aashu ki abhi bhi koi chamatkar ho jata aur ek subah jab main so ke uthati to khud ko Nimmi aur Nikki ki tarah gori-chitti paati!!"Aru ki yah bachkani baat sunn kar Aashu hans diya.
"waise Bharat me rah ke tumhare papa Videshiyon ki tarah kyu rang-bhed kar rahe hain ye main samajh nahi pata hu."Wah achanak gambhir ho gaya,"yah kisi se nafrat karne ki thos wajah nahi hai! ek na ek din ahsaas hoga ki jise unhone koyla samajh kar chhod diya tha,wah heera hai!"
"unko ye kabhi mashoos ho na ho,per unke liye mere mann mein khatas ke alawa aur kuch nahi hai,Meri zindagi ko tabah karne mein unhone apni ore se toh koi kasar nahi chhodi thi"Aru gusse mein boli.
"per ab to zindagi sanwar gayi na,to ab tum purani baate bhool kyu nahi jaati?"
"chahti to main bhi aisa hi hu...infact ghum ka ahsaas ab kuch halka bhi ho gaya hai..shayad samay ke sath mit bhi jaye"
"I wish aisa hi ho"

Siddhant ki anupasthiti mein Aru ki zindagi purane dharre per chal rahi thi.Kavita ki shadi ke baad Siddhant ka Patna aana kam ho gaya tha.Fir bhi wah kabhi kabhar Shanivar ko aa kar,ravivaar ki sham ko laut jata tha.Aru ko ye thik nahi lagta tha,kyunki Siddhant ko iss se asuwidha hoti thi ye wah janti thi.Per uske paas aur koi dusra rasta nahi tha milne ka.Siddhant ne ab tak apne Papa se kuch kaha tha,na hi Aru ne kisi se kuch kaha tha.Sabne chuppi sadh li ki jab pata chalna hoga,chal hi jayega.

Achanak ek din Aru ko pata chala ki Siddhant ke papa ka dehant ho gaya hai.Iss dukhad samachar ko paakar bhi Aru uske ghar nahi ja payi.Kyunki uski tabiyat kuch thik nahi thi.Wah chahti thi ki Siddhant usse doctor ke paas le chale per aise waqt me ye sambhav nahi tha,so wah akeli hi chali  gayi.Uska andaza sahi tha,wah maa banne wali thi,do mahine ka garbh tha.Siddhant ko ye batana zaruri tha per ye sahi waqt nahi tha.Fir usne Siddhant ko phone kiya.
"mujhe location samjha dete to main aa jati"
"tum ghar aana chahti ho?"
"haan,Mummy se milne ka mann tha aur fir tumse bhi ek baat karni thi..""
"main bhi chahta tha ki tum yahan aao,but mummy ne kaha ki abhi grihpravesh ka shubh muhurat nahi hai..isiliye tumhe bulane nahi aaya.Waise kya baat hai? kuch important hai to abhi bolo,ya fir jab aaunga tab batana"
"baat bad me ho skti hai,koi baat nahi tum pareshan mat hona aur mummy ka khayal rakhna,wo upset hongi na"
"maine unhe aise kabhi nahi dekha hai...wo toot gayi hain Aru! Bahut dukh ho raha hai mujhe...Bhagwaan pati patni ki jodi ko kyu alag kar dete hain?Mummy kaise rahengi unke bina Aru?"kahte huye Siddhant ka gala bhar aaya to Aru bhi udas ho gayi.
"samay ke sath mummy bhi normal ho jayengi..time heals everything"
"to kya tum abhi apni bat nahi kar sakti ho?"Siddhant ne topic change kiya.
"kah sakti hu,per kahna nahi chahti...ek baat kahu,bura nahi manoge na?"
"kaho na.."
"tum upset nahi ho na...tum bahut normal sound kar rahe ho...."
"main normal isiliye hu kyunki main janta hu ki jo chala gaya hai wo laut ke nahi ayega..! per iska matlab ye nahi hai ki main dukhi nahi hu.Raat ko jab sone jata hu to unki yaad aati hai..aisa lagta hai ab mera guardian koi nahi raha...bachpan ki kitni saari baatein yaad aati hain..papa hum dono ke sath sunday ko khelte bhi the..hamari har demand puri karte the..mummy mana bhi karti thi ki bachcho ko kyu bigaad rahe hain? to papa kahte the-main nahi karunga to aur kaun karega mere bachcho k liye?   aur aaj Aru,mere liye sab kuch karne wale mere papa nahi rahe"kahkar siddhant chup ho gaya.Kuch pal yu hi beet gaye,wo kuch nahi bola to Aru samajh gayi ki wah zarur ro raha hai.
"I am so sorry Siddhant,mujhe aisa nahi kahna chahiye tha..Mujhse sachmuch galati ho gayi"Aru ko apradhbodh hua.
'"per fir bhi Aru,apne liye kam aur mummy ke liye jyada dukh ho raha hai mujhe.Main to apne work me busy rahunga,aur fir mere paas tum bhi ho,per mummy to akeli ho jayengi.Unka dukh baantne wala koi nahi hai Aru!"
"hum log hain na Siddhant"
"haan hum hain to..per jeevansathi ki jagah koi nahi le sakta,uske sath ki zarurat to jeevan bhar rahti hai"
"Tum mujhe chhod to nahi doge na Siddhant?"
"ye kya kah rahi ho?maine tumhe chhodne k liye shadi thode hi ki hai..."Aru ke prashn per wo chaunk gaya.
"main kaali si hoon na,tumhare aage main kahi stand nahi karti isliye...."
"come on Aru! tum janti ho main tumse kitna pyar karta hu...aur chahe kuch bhi ho jaye main hamesha tumhare sath hoon.Achcha batao ab tumhari tabiyat kaisi hai?"
"thik hai"
"Achcha ab rakhta hu...milte hain kisi din to baat hogi"
"OK"


END OF PART-7

Tumhara Mann Dekhkar Part-6

Aru jab poori tarah taiyyar ho gayi tab aaine me khud ko dekhte huye usse yakin nahi hua ki wah ab shadishuda hai.Mehandi bhi rachi hui thi,chudiyan bhi usne pahni thi.Asli-nakli kuch gahne bhi the,maathe per bindi bhi thi,sindoor bhi tha...per kahan thi wo rasme?Kanyadan,sindurdan,fere..jo usse shadishuda hone ka bodh karati?Wah kuch udas si ho gayi.
                                                                                                        Siddhant ne jab Aru ka yah roop dekha to kuch pal ke liye awaak sa khada usse dekhta rah gaya.Wah shuru se Aru ka sadharan rahan-sahan dekhta aaya tha.Na wah pahle kabhi bann sawar kar school-college aati thi,na hi uss din usne koi shringar kiya tha jab wah pahli baar iss flat me uss se milne aya tha...jab usne pahli baar Aru ka sparsh kiya tha.Uss din ki yaad ne Siddhant ko romanchit kar diya.Per aj wah usse bahut sundar lagi....Amrita se bhi jyada.
"Aap log baith k baate kijiye,main abhi aayi"Nikki unhe akela chhod k room se nikal gayi.
Siddhant sofa per baith gaya aur Aru kuch asahaj mahsoos karte huye apne pasandida couch per baith gayi..aur ek sanwadheenta chaaro ore fail gayi.Siddhant chupchap ektak Aru ko dekhe ja raha tha aur wah sharm se pani pani hui ja rahi thi.Uske kapol jalne lage,wah Siddhant ke nazron ki tapish bardasht nahi kar pa rahi thi..swabhawik roop se uski sharm ne uski sundarta ko aur badha hi diya.

"lo main aa gayi"Nikki ki aawaz sunn Aru ko kuch rahat mahsoos hui."Aray Di,tum udhar kyu baithi ho?yahan Jeejaji ke paas aa ke baitho"
"kyon?"Aru ne dheere se pucha.
"kyon kya? Aray,ap dono ki sathsath ek-aadh photo toh honi chahiye,hai na? chalo yaha aao"

Aru chupchap uthkar Siddhant ke bagal mein aa gayi.
"Ab muskurao,say cheese....lo ho gaya.."
                                                                 Teeno wahi baithe kuch kuch baat karne lage.Siddhant ne Nikki ko ek gift bhi diya apni shadi ki khushi mein.Raat ka khana khaane ke baad bhi kuch der baate chalti rahi fir achanak Nikki uth khadi hui.
"Mujhe bahut neend aa rahi hai"wah boli.
"Main bhi aaj iss bhaag-daud mein thak gaya hu"Siddhant bhi uth khada hua to Aru bhi uth gayi.Dono Aru ke kamre ki ore badhe to Nikki lapak kar darwaje per khadi ho gayi.
"Pahle jeb khali kijiye Jeejaji,fir andar jane ko milega"Nikki ne Siddhant ke aage hatheli pasaar diya.
"per ye rasm to shayad ladke ki bahan ada karti hai,hai na Aru?"Siddhant ne Aru ki ore dekha.
"Ab ladke ki bahan dwar chheke ya ladki ki bahan,kya fark padta hai? Jab yahan Kavita Di nahi hain to mujhe mauke ka fayda milna hi chahiye"
"theek hai,fir jo kuch meri jeb mein hai...sab tumhara..."kahkar Siddhant ne apna purse aur mobile nikal k Nikki ke hath per rakh diya.
"Aapko andar jaane ki itni jaldi hai ki sab mujhe de diya?? Per iss mobile ki mujhe zarurat nahi..."
"kyun? tumhe kisi se,I mean someone special se baat nahi karni??"
"Haaye meri aisi kismat kahan?Women's college mein kaun special person milega mujhe??"Nikki aah bharkar boli.
                            Jeeja Saali ki iss hasi mazak se Aru ubb gayi.Siddhant ne kitni aasani se use apni patni aur Nikki ko apni saali maan liya tha,per kya wo kabhi Siddhant ko dil se apna pati maan payegi??Usse pyar kar payegi?Wah to aaj bhi usse apna kareebi dost hi manti thi..bhale hi uss din wo sab ho gaya jo dosto ke beech shobha nahi deta hai..Aur aaj bhi Siddhant usse jaane kaisi nazron se dekh raha tha...ab to wo usse mana bhi nahi kar payegi ki wah uss se alag rahe....

"Tum kya sochne lagi Di?Jao,main apna neg vasool liya.good nite"Nikki apne kamre me chali gayi aur Aru apne mein.
Kamre ki batti jalte hi Aru muskura uthi.Bade kareene se Nikki ne bistar per satin ki sunahri chadar bichha kar laal gulab ke phoolon se sajawat kar rakhi thi.Toh ye thi uski suhaagsez! Bhale hi filmo usne poore kamre ko phoolo se saja dekha tha,per yaha ye kamra bhi Aru ko achcha laga.Wah apne me hi khoyi rahti ki achanak Siddhant ka khayal aaya.Uski ore dekha to paya wo Aru ko hi dekh raha tha.
"sorry,mujhe dhyan hi nahi raha ki tum bhi yahi ho"
"jab meri aadat ho jayegi,tab aisa nahi hoga"wah Aru ki ore badha.Aru do kadam peeche hat gayi.
"tum mujhse darr kyu rahi ho?Main wahi hoon...tumhara dost...tumhara Pati...Mere paas aao Arunima"Siddhant ne pyar se kaha to wo inkaar nahi kar payi.
"Tum aaj bahut sundar lag rahi ho ..."kahkar jaise hi Siddhant ne uske gaal ko chhua,achanak Aru ka mobile ring karne laga.
"Itni raat ko kisne call kar diya?tumne mobile off kyun nahi kiya??"Siddhant jhunjhla gaya.
Aru ne mobile haath me le ke dekha to paya ki Aashu ka call tha.
"hello"
"ho gayi shadi tumhari?"
"haan ho gayi"
"sab thik se ho gya na?koi problm to nahi hui na,tumhara call nahi aaya to.."
"nahi sab thik hai"
"congrats"
"thanx"
"Aage ka kya plan hai?"
"baad me bataungi"
"kyon?"
"wo..."Aru ki samajh me nahi aaya ki kaise kahe ki ab phone rakho.
"kahi wo tumhare sath..O I am so sorry sis! mujhe bilkul bhi dhyan nahi raha...."wah khud hi samajh gaya.
"koi baat nahi"
"thik hai fir....I wish all the happiness for u.Bhagwan kare sab kuch ab theek waisa hi ho,jaisa ki tum chahti ho....and sorry for disturbing...phone rakhta hu,mere Jeejaji to phone karne wale ko kos hi rahe honge .."
"shut up" wah hans di...fir phone off kar diya.
"Kaun tha? ya fir thi?" Siddhant ne pucha to Aru samajh gayi ki ab uski zindagi me bhi prashn karne wala wah shakhs aa gaya hai jiske har prashn ka usse jawab dena hi hoga.
"Aashu tha,Aashutosh Sharma...mera net frend...jo ab phone frend bann gaya hai"wah boli.
"Iske baare mein toh tumne mujhe kabhi nahi bataya Arunima"usne complain ki.
"Per tumhare baare mein maine usse sab kuch bata rakha hai"wah muskurayi
"sab kuch??"
"hamari dosti ke baare mein,college ke kisse...sab!! Siwa....uss din jo hua.."kahte kahte Aru sharma gayi.
"Mujhe jalan ho rahi hai,tum uss se sab baat kahti ho,mujhse nahi"
"tumhe bekar hi jalan ho rahi hai,wo mere bhai ki tarah hai aur mera legal advisor bhi hai"

"Khalnayak hai tumhara bhai"uski baat kaatkar siddhant bola.
"kya?" wah samjhi nahi.
"yen mauke per phone kar ke mere romantic mood ka satyanash kar diya"
"ab usse kya pata ki tum yaha ho..."Aru ne safai di.
"dont mind,main bas yu hi tumko tease kar raha tha...main us se jal nahi raha hu,kyunki aaj se tum meri ho ye sachchai hai aur tum hamesha meri hi rahogi ye mera vishwas hai."
                                                                                                                                 Aru muskura di,sochne lagi ki Amu se bhi Siddhant aise hi pyar bhari bat karta hoga.
"Kya sochne lagi?"
"kuch nahi"
"ye Mummy ne tumhare liye bheja hai"usne jeb se ek mangalsutra nikala.Aru bina kuch bole uske paas aa gayi toh usne Aru ko wah mangalsutra pahna diya.

"Aur tum kya laaye ho mere liye?"
"tumhare liye?"usne chaunk ker pucha
"haan!maine suna hai shadi ki pahli raat ko pati apni patni ko muh dikhayi me tohfa deta hai"
"per tumhara chehra koi aj main pahli bar to nahi dekh raha hu"
"kya fark padta hai? ye to ek rasm hai"
"OK then,iss rasm ki adayegi mein Arunima Singh,main swayam ko hi aapke hawale karta hu.Aaj se main poora ka poora aapka hoon"Siddhant ne kaha to Aru hans di.Aur fir wahi sab hua jo sadharantah hota hai shadi ki pahli raat mein!!

END OF PART-6

Tumhara Mann Dekhkar Part -5

Siddhant ne ek vakil dost ki madad se shadi ke liye apply kar diya.Ek mahine baad yaani 29June ka date fix ho gaya.Har din Aru maa papa ke phone ka intzar karti rahi.Shadi ki suchna milne ke baad unki narazgi jhelne ko wah mann hi mann taiyar thi.Per aisa kuch bhi nahi hua.Nikki se baat hoti thi per wo bhi iss vishay mein kuch nahi bolti thi.Idhar Siddhant ne Aru ko phone kiya to bataya ki uske ghar Mumy ko letter mila court se bheja hua.Per unko koi dikkat nahi thi,haan heart patient Papa ko unhone kuch nahi bataya.
                                            25 June ko achanak Nikki ko Neel Aru ke ghar pahucha gaya.
"Aray Nikki tum achanak kaise?Tum to July me aane wali thi na?"Aru use dekhkar chaunk gayi.
"bas..tumhare bina mann nahi laga mera"Nikki muskurayi.
                                                                                              Aru ko chinta ho gayi.Wah Nikki ko apni shadi ke vishay me nahi batana chahti thi aur Siddhant ka irada shadi ke baad 2 din tak Aru ke sath rahne ka tha.Usse sharm ayi ye soch ke ki chhoti bahan ke sath wo kaise Siddhant ke sath...!!!Uski iss shadi ka galat prabhav na pad jaye kam umra ki Nikki per.

"Di,raat ke khaane ke liye kya banaun?"Nikki ki aawaz sunn couch per adhleti Aru ne aankhe kholi.
"tum kuch soch rahi thi Di?"Nikki uske pas aa k baith gayi.
"nahi..kuch bhi to nahi"Aru dheere se boli.
"ek baat kahu Di?"
"kaho"
"main jab se aayi hu tumhe udas dekh rahi hu.Tum itni upset kyu ho Di,jabki tumhara decision ekdum sahi hai...."sunkar Aru hairani se NIkki ko dekhti rah gayi.
"Mujhe pata hai tum shadi kar rahi ho.Court ka letter jab ghar aya tha papa to the nahi,maine receive kar liya.Padhkar pata chala ki tum court marriage kar rahi ho.Isliye main pahle hi yaha aa  gayi"
"sabko bata to diya na tumne?"hichakte huye Aru ne poocha.

"Paagal ho gayi ho kya Di?Batati to tumhari shadi me vighn dalne ke liye kitne log khade ho jate.Shadi kar logi to Nikki ko kaise padhaogi?Neel ki jo madad karti ko wo kaise hoga,kabhi kabhar maa ko jo paise bhejti ho wo band ho jayega.Papa ne to kabhi tumse koi vasta rakha hi nahi,aur maa apne inhi swarth ki purti ke liye tumhari shadi ke bare me nahi soch rahi hain."
"Tumhari padhai me koi badha nahi ayegi Nikki,jo jaisa chal raha hai wo chalta rahega"
"Nahi bhi chale toh bhi mujhe koi fark nahi padta Di.Main papa ki jimmedari hu,tumhari nahi!"
"maine khud tumhari responsibility li hai aur main uss se piche nahi hatungi,per fir bhi pata nahi kyu mujhe guilty feel ho raha hai"
"tum bekar hi guilt me jee rahi ho Di.Nimmi Di ne jab ghar me thaan diya tha ki jab karengi tab usi Arnab Chatterji se shadi karengi tab unhe to koi guilt feel nahi hui thi.Aur jab papa ne badi se pahle chhoti ki sagai kar di to unhe bhi koi guilt mahsoos nahi hui thi..tumko chhodne mein bhi unhe guilt mahsoos nahi hui thi....fir tumhe kyon?? Apne mann se ye sab...ye guilt,chinta,confusion..sab nikal feko aur apni nayi zindagi ka swagat khushi khushi karo..."
                                                                                                 Jis bahan ko Aru chhoti samajhti thi,wah 20 ki umra mein uss se bhi jyada samajhdar aur paripakwa ho gayi thi.Per Nimmi ke vyawahar se usse dukh hua,Jab zarurat thi tab har roz phone karti thi.Per jab zindgi ka itna bada faisla liya tab usse bataya tak nahi.Sach baat to yahi hai ki wah bhale hi usse apni sagi bahan ki tarah manti thi per Nimmi ne usse sauteli se jyada kuch nahi samjha.

                                                                                  Nikki agle din se Aru ki shadi ki taiyyariyo me jut gayi.Mehandi,saree,chudiyaan.............Aru khush to hui ki Nikki ko uska kitna khayal hai..
"per yah sab tum kyu layi Nikki?"usne pucha.
"kyu?shadi me inki zarurat nahi hai kya?"
"aray pagal main court me ye sab pahan k thode na jaungi.."
"haan,waha na nahi jaogi,ghar lautne per kam se kam utna to sajogi na jitna ek nayi naweli dulhan sajti hai?tumko to main janti hu,tumhe ye makeup.ye chudiyan,ye sab pasand nahi hai...per tumhare hone wale patidev? mere hone wale jija ji ke to kuch armaan honge...yah sab main unke liye layi hu,samjhi?"Nikki has k boli to Aru kuch jhenp gayi
                                                                                       Aru ki shadi ko le k Nikki kuch jyada hi excited thi.Wah Aru se paise le kar taiyariyo me juti thi.29 ki subah rozana ki bhanti jeans kurta pahan ke Aru taiyar ho gayi.Us din bhi usne chutti le li thi.Samay per siddhant aya.Aru ne nikki se bhi chalne ko kaha per kuch kaam ka bahana kar k wo ghar pe hi ruk gayi.
                                                                                                                       Dopahar ko jab Siddhant ki patni bann Aru ghar ayi to dekha Nikki ne sara ghar saza rakha tha,rasoighar se swadisht khane ki khushbu aa rahi thi.Aru ke liye ye sab sukhad ascharya se bhara hua tha.Khana khaane ke baad Siddhant apne ghar chala gaya.
"Main shaam ko aunga"jate jate usne kaha.
"tum mere room me aaram karo Di,main tumhare room ki thode decoration kar doon,fir aa kar tumhe sajaungi"
"per tum bhi thak gayi hogi,subah se kaam me lagi ho,ab aur decoration rahne do,chalo rest kar lo"
"aray nahi Di,rest lene ki fursat nahi hai.decoration to mujhe karna hi hai kyonki apki shadi to bar bar nahi hogi aur na hi ye precious night dubara ayegi.....kyon? hai na?"Nikki muskura k boli.
"ab aur kuch boli na to dekh lena nikki,pitayi karungi tumhari.Kahan se ye sab night-wite ki baat tujhe pata chali?Maa sunengi na,to kahengi,unki choti si,bholi bhaali Nikki ko maine bahkaya hai,aisi waisi baate sikhayi hain..."serious ho ke bolne ka natak kar rahi thi Aru per man hi mann usse bhi hansi aa rahi thi.

"aray,maa se kaun kahega ye sab? but u know what Di,hamare mahan college ki mahaan ladkiyo ke beech aise kya,iss se bhi jyada  bhayanak baate bilkul normal baat ki tarah hoti hai"
"to kya tum bhi karti ho Nikki?/"
"karti to nahi hu,per chupchap un logo ki bakwas sunn leti hu"
"hamare college me ye sab nahi hota tha"
"aap co-ed me thi.ek hi group me ap ladko ke samne kaise waisi baate karenge?kash mera admission bhi co-ed me hota.kahan se ye women's college mere palle pad gaya Di? Kuch aur jyada percent aaye hote mere to apke hi college me admission mil jata na?"nikki udas hui.
"chalo koi baat nahi,ye sab hota rahta hai,udas hone ka nahi,khush rahne ka"
"aray haan,main udas kyu ho rahi hu...wo bhi aj ke din jab meri Di ki shadi hui hai.... Ae Di,bolo na,honeymoon ke liye kahan jaogi??"
"tum fir shuru ho gayi?"
"waise abhi garmi ka mausam hai to shimla ya nainital ja sakti ho.per tumhe to paani se prem hai,to tumhe goa ya puri jana chahiye"
"mujhe neend aa rahi hai"
"haan to jao na ek nap le lo...per goa ya puri??"
"kahi nahi"
"kyon?"
"kyonki main chali jaungi to tum yaha akeli kaise rahogi?"
"to fir mujhe bhi le chalna,meri bhi outing ho jayegi"
"Siddhant ko ab chutti nhi milegi.."
"haan ab jab main chalne ko taiyar hu to khoob bahane karo"
"tum Siddhant se baat kar ke dekhna"
"ye kya baar baar Siddhant Siddhant kar rahi ho? wo tumhare pati parmeshwar hain,unka aise hi naam le k unka apmaan na karo.."
"Parmeshwar to hai nahi,aur pati se pahle mera frend hai"
"tumhare frend hain to kya main unhe bhaiya kah sakti hu?"
"kaho,mujhe dikkat nahi hai"
"kya Di? maine tum dono ko bhai bahan bana diya aur tum chidhi bhi nahi"
"main thak gayi hu"
"jao na,so jao kuch der//"

Aru so kar uthi to shaam ke 5 baj gaye the.Kamre se bahar ayi to dekha Nikki maze se sofe per leti TV dekh rahi thi.
"jao Di,jaldi se shampoo kar k naha k aao..main jijaji ke aane se pahle tumhe taiyar kar dena chahti hu"
"yah zaruri hai kya?"
"bilkul zaruri hai bhai! chalo na,jaldi karo...7 baje tak wo aa bhi jaynge..."


END OF PART-5

Tumhara Mann Dekhkar Part-4

Aru ke Pita Nalin Pandey 2 bhai the.Tau Atul Pandey ke 2 bete the aur tab Aru iklauti thi.Aisa Aru ke sunne mein aya tha ki uske pita uski maa ko pasand nahi karte the.Unke gori patni chahiye thi jabki Aru ki maa sanwle rangat ki thi.Aru ne bhi maa ka rang hi paya tha.Aur shayad isi wajah se wah pita ka pyar paane se sada vanchit rahi,Jab wah 5 saal ki thi tab ek lambi bimari ki wajah se maa chal basi.Fir to uske pita ne der nahi ki, aur usi mahine le aaye apni pasand ki sundar,gori patni.Aur fir awanchhit Aru ko Motihari se Patna bhej diya gaya jahan uske dada-dadi aur Tau-Taayi rahte the.Ghar to Tau ka tha,chhote bhai per wah naraz bhi rahte the per fir bhi Aru ko daya ki drishti se dekhte huye apne ghar rahne diya.Dada ne ek chhoti stationery ki dukan ghar ke niche khol rakhi thi,usi ki aamdani se Aru ko paalne lage.Teej-tyohar mein Tau naye kapde banwa dete the.Bas,aise hi zindagi chalne lagi.

                              Tau ke dono bete Aru se bahut bade the aur bahar padhte the.Chuttiyo me ghar aate the tab Aru se mulakat hoti thi,per unse uska najdiki sambandh nahi tha.Tau bank me manager the.Jab Aru 10th mein padhti thi tab unka transfer bahar ho gaya aur wo chale gaye.Itne saalo mein Aru ke papa ko nayi maa se 3 bachche huye.2 betiyaan-Nimisha aur Nikita aur ek beta Neelratan! Sauteli maa,apne pita bhale hi Aru ko pasand nahi karte ho,per sautele bhai-bahano se Aru ki achchi banti thi.
             Kabhi Motihari jaati Aru to Nimmi aur Nikki ke mahange kapdo ko badi lalsa se dekhti thi.Waise achche kapde usne kabhi nahi pahne the.Kuch din ghar per rahkar wah fir wapas aa jati thi.

Siddhant bachpan se usi ki class mein padhta tha.Dheere dheere dono mein dosti ho gayi.Wah kabhi kabhar ghar bhi aata tha.Amrita jab padhne Patna aayi to Aru ke sath Tau ji ke ghar mein hi rah gayi.Siddhant aur Amrita ke prem ko dekhti Aru bhi isi intzar mein thi ki kabhi uski zindagi mein bhi koi ayega jo usse bahut pyar karega.Haalanki wah tabhi se janti thi ki Mama kabhi inke rishte ke liye taiyar nahi honge.Amu ko usne bahut samjhaya bhi tha,per fir bhi dono ke liye wah khush thi aur sath hi apne liye dukhi kyonki uski zindagi me koi nai tha.College ki ladkiyo se maang ker dono ne itne Mills and Boons ke upanyas padhe the jiska koi hisab nahi tha. Romance ki kalpana mein doobi Aru ka mann hamesha se hi prem vivah karne ka tha,Per jab usne Amrita aur siddhant ka hashr dekha usne tay kiya ki ab pati se hi pyar karna hai taaki uske sath waisa na ho jaisa unn dono ke sath hua.

Isi beech uski dadi ka dehant ho gaya.Aru ka result aa chuka tha.Per beemar dadaji se dukan ka kaam nahi sambhalta tha,so dukan band ho gayi aur ghar ka arthik sankat badh gaya.Aru ka aage padhne ka sapna sapna hi rah gaya.Fir bhi ek din himmat kar ke Papa ko paiso ke liye phone kiya toh unhone saaf palla jhaad liya ki unhe Aru se koi matlab nahi,wah jo chahe kare! Aru ke pas aur koi chara nahi tha.Anichcha se paas ke ek school mein naukri pakad li.
                                                                                         Bahut socha ki Tau ji se kuch madad mange per sankochwash nahi kah payi,aur fir unhone apne ghar me rahne diya tha yahi kya kam tha? Uski chhoti si salary mein bahut mushkil se ghar chalta tha. Usse padhate lagbhag 3 saal beet chuke the.School me wah computer padhati thi.Bas wahi intenet per Aashu se mulakat ho gayi uski.

Isi beech ek chamatkar hua,haan! Aru isse apni zindagi ka chamatkaar hi manti thi. Ek din achanak ek sajjan uske ghar aaye Mrs Rani Sinha ka sandesh le kar.Sinha Mam usse 11-12th class mein english padhaya karti thi.Aur wo bahut beemar thi,aur Aru se milna chahti thi.
                                                                                                                             Unki bimari ki khabar sunkar Aru ne chhutti li aur turant unke patra me likhe pate per pahuchi.Aru ko wo bahut pasand thi kyunki unme usse apni maa ki jhalak dikhayi deti thi.Unke ghar pahuchi to pata chala ki wah bilkul akeli thi.Pati ka swargwas ho chuka tha aur bachche bhi nahi the.

"aap yaha itni beemar aur akeli hain?apne mujhe pahle hi khabar kyu nahi ki?"Aru ko rona aa gaya.
"ab to kar di na?" wah muskurayi.
"Apne doctor ko dikhaya? kya hua hai apko?"
"cancer"
"kya?"sunn ke usse ek jhatka laga.
"jab tak diagnose ho pata ,bahut der ho gayi thi...aur ab to jeene ki ichchha bhi nahi hai.."
"kya ab kuch nahi ho sakta?" Aru rone lagi.
"nahi! doctor ne hospital se chutti de di hai.Ab jitne din ji loon utne bahut hain...mujhe khushi hai ki tum milne ayi aur meri ichchha ka maan rakha"a
"main kaise nahi aati?apki kisi bhi bat ka kabhi anadar kiya hai maine ?"

Kuch der baithne ke baad dubara aane ka vada kar Aru ghar chali ayi.Beemar dadaji ki sewa bhi zaruri thi.Fir sunday ko Sinha mam ke ghar jaane ka plan banaya usne.Per shukrwar ko wahi sajjan ghar aaye aur unki mrityu ka samachar sunaya.Wah Sinha mam ke lawyer the aur unhone Aru ko bataya ki Sinha mam ne apna ghar bech kar sare paise Aru ke naam vasiyat kar di hai.

Kuch hi dino mein Aru ke bank account me 20 lakh rupaye jama ho gaye.Aru ko laga ab wah apne sapno ko pura kar payegi.Unhi dino Nimmi ka phone aya ki papa ka business band ho gaya hai,isi wajah se wo dono bahno ki padhai band karwana chahte hain.
"per main padhna chahti hu Di,mujhe doctor banna hai,per ab lagta hai ye sambhav nahi hai...."phone per Nimmi ro di toh Aru ka mann paseej gaya.Abhi tak vasiyat me mile paiso ke bare me kisi se nahi kaha tha,per emotions me bah k Nimmi se kah diya.
"main padhaungi tumhe Nimmi,tum chinta mat karo"

Bas,usi din ke baad se roz kabhi Nimmi ke phone aate,kabhi uski maa ke.Maa k achanak umde iss prem se Aru ghabra gayi.Bahut sochkar Aashu se salah lene ka faisla kiya.usko sab baat bataya.
"Tum toh apni padhai puri karne wali thi na,ab ye Nimmi kahan se aa gayi beech mein??"
"come on Aashu,wo bahan hai meri,uske bare me sochna mera farz hai.."
"theek hai socho,sabke baare me socho,per khud ko mat bhulo"
"kya matlab?"
"matlab ye ki pura bank balance Nimmi ki padhai me kharch karogi?? tumhe abhi apne baare me bhi sochna hai"
"to kya karoon?"
"to ye karo,usko medical entrance ki coaching kara do,jab wo qualify ho jaye tab loan dilwa dena,ajkal student loan lena mushkil nahi raha,tum sunn rahi ho na?"
"haan,tum thik kah rahe ho"
"aur suno,ek baat aur,jab tak tumhare pas cash hai,us cash ke liye koi na koi tumhari buttering karta rahega,tumse pyar se baat karke koi bhi tumhare paise hadap lega"
"to iske liye kya karoon?kahi invest kar doon? shares me?"
"nahi,shares ki to sochna bhi mat! invest waha karo jaha fayde ki guarantee ho"
"kahan?"
"property mein"
"u mean jameen??"
"nahi,,,koi chhota sa ghar ya fir flat....flat hi thik rahega"
"haan,waise bhi mera rahne ka koi thikana nahi hai.Tauji kab yaha se jane ko kah de,koi thik nahi hai.Aur papa to mujhe...."wo rone rone ho gayi.
"chill sis chill!! ab udas hone ka waqt beet gaya hai tumhara! Waqt hai apna career,apni life set karne ka"

           Aashu ki baat mankar Aru ne pahle apne liye ye 3 kamre wala flat liya.Uske baad Nimmi ko coaching karne ke liye bulaya aur khud computer course karne lagi.1 saal baad Nimmi ka admission MBBS me ho gaya,loan bhi mil gaya aur wo kolkata chali gayi.Idhar Aru usi computer institute me trainer ho gayi.
                        Fir Nikki ko bhi padhne ko bula liya.Nikki Women's college se BA karne lagi,fir use MBA karna tha.Achanak ek din Nikki ne usse bataya ki maa papa kolkata ja k Nimmi ki sagai kar aye hain.Ladka college me uska senior tha aur dono ek dusre se pyar karte the.Pratyaksh mein Aru ne khushi jatayi per andar kahi kuch chatakh gaya.Uss se 6 saal chhoti Nimmi ki sagai papa ne kar di,per uske baare mein ek baar bhi nahi socha?yaha tak ki sagai ki khabar dena bhi uchit nahi samjha un logo ne.Wapas lautne ke baad albatta maa ne phone kiya apni safai dene ke liye.
"apne papa ki maali halat to tum janti ho Aru,dahej dekar betiyo ka vivah karna unke liye sambhaw nahi hai.isliye ladke walo ki ore se ye rishta aya to hum naa nahi kah sake.unn logo ki koi maang bhi nahi hai.abhi sirf sagai ki hai,shadi to saal-do saal ke baad hi hogi.....tum bura mat manna,tumhare liye bhi rishta aya to hum vichar karenge.aur fir Nikki ko bhi to tumhe hi dekhna hai....."maa ne na jane kya kya kaha! Aru chupchap sunti rahi...aur kar bhi kya sakti thi??

Aur ab aakhirkar uske liye rishta aa gaya hai.Maa ne kaha tha ki "vichar karenge" per Aru ne tay kiya ki wo unhe kuch batayegi hi nahi ki vichar karne ki naubat aaye.Jab court ki chitthi jayegi,wo khud hi jan jayenge.
                     Nimmi ki sagai bhi dhoomdhaam se hui thi aur november me shadi bhi dhoom se hogi,per uska sapna to sapna hi rah gaya...na mehandi lagegi,na mangal geet gaye jayenge...koi shamil bhi to nahi hoga uski shadi mein...apni kismat k vishay me sochkar 2 bond aansu aankho ki kor se bah gaye.

Subah uthkar pahla kaam yahi kiya Aru ne ki Siddhant ko phone kar ke shadi ki rajamandi de di.Ab chahe jo ho....

END OF PART-4

Tumhara Mann Dekhkar Part-3

 Aankhe khuli achanak mobile ki ring sunkar.Call receive kiya to dusri ore Siddhant ko paya.
"Ab tumne call kyu kiya hai Siddhant? Maine kaha tha na ki tum mujhe bhool jana"
"dekho Arunima,naraz mat hona tum...meri baat sunn lo plz"usne anurodh kiya.
"bolo"
"jab maine shadi ke liye kaha toh tumne 3 wajah ginayi,jinki wajah se tumhe ye shadi manjoor nahi"
"haan,toh?"
"toh maine bahut socha,bahut aatm manthan kiya aur paya ki haan main Amrita se pyar karta tha,per inn 7 varsho mein maine usse dekha tak nahi hai.Kitne dino se to aisa ho raha tha ki main amrita ka chehra yaad karne ki koshish karta tha to mujhe tumhara chehra nazar aata tha.Amrita ka sath mere jiwan me 3 varsho ka tha,per tumko toh maine duso saal se janta hu.Uske jaane ke baad jab bhi tumse meri baat hoti thi,main mann me sochta tha ki Kash! wo bhi mere baare mein aisa hi sochti,meri itni hi care karti.Main nahi janta ki mera pyar aaj Amrita ke liye cum ya khatam hua hai ya nahi,Main ye bhi nahi janta Arunima ki main tumse pyar karta hu ya nahi,per main tumse ek lagaw sa mahsoos karta hu aur main janta hu main tumhare sath khush rahunga"
"per main..."
"pahle meri poori baat sunn lo Arunima! rahi tumhari baat ki tum mujhse pyar nahi karti,toh main ye janta hoon,lekin mera vishwas hai ki jab hum sath rahenge to humare beech prem ho jayega,agar tumhare mummy papa tumhari shadi karte to uss anjan vyakti se tumhe ek din pyar ho hi jata.."
"per intercaste..."
"zamana badal raha hai Arunima.Intercaste marriage ab pahle ki tarah nahi raha ki parents nahi manenge ya fir bahno ki shadi nahi hogi.Waise bhi Nimmi ki sagai ho chuki hai aur Nikki ko abhi padhna hai.Main promise karta hoon ki main Nikki ki life settle karne me tumhari help karunga"
"mujhe samajh me nahi aa raha hai ki main kya kahoon?"
"apna faisla jaldi batana kyuki Kavita ki shadi aur papa ke heart problem ki wajah se humein court marriage karni hogi,main baad me mauka dekh ke ghar pe bata dunga"
"Main soch kar tumhe bataungi"
"Thik hai,socho! per itna yaad rakhna Arunima ki tumhare har faisle ka main samman karunga aur tumhe shadi ke baad har tarah se sukhi aur secure rakhne ka vada main karta hoon..mujhe bas tumhara sath,tumhara support chahiye"
                                                      
                                                              Fir se ek bar uljhan me thi Aru. Dimag kahta tha Siddhant ke sath vivah karne mein koi burai nahi hai.Kyunki aaj jo kuch bhi hua uske baad wah kabhi kisi dusre se uss tarah ka sambandh nahi rakh payegi,Siddhant uske jeevan ke khalipan ko bhar dega.Per dil kahta tha ki pyar aur dosti ko aapas mein nahi milana chahiye.Iss shadi ke baad log  yahi kahenge ki ek ladka aur ek ladki kabhi sadharan dost nahi ho sakte,kabhi na kabhi unko aapas me pyar ho hi jata hai.Jab bahut sochne ke baad Aru kisi nirnay per nahi pahuch saki tab usne Aashu ka khayal aaya.

Raat me Aashu ko call kiya.
"kya baat hai,ek hi din me 2-2 baar yaad kiya mujhe aapne?"udhar se Aashu ki hasi sunai di.
"ek salah leni thi tumse"wah kuch hichakte huye boli
"tabhi main kahu ki kaise tumne mujhe call kiya..bolo na kya baat hai?"
"mere liye ek rishta aya hai"wah dheere se boli.
"haan kar do..waise ladka kya karta hai?"
"uski job hai,ek mnc mein"
"haan kar do,dekhne mein kaisa hai?"
"handsome hai.."
"haan kar do,family kaisi hai uski?"
"sab kuch behatareen hai"
"toh fir haan kar do,mujhse ijajat lene ki kya zarurat hai?" wah hansa
"ijajat kaun le raha hai?" wah chidh gayi,"aur ye hasna band karo.I am serious,ek problem hai"
"kya?"
"wah brahman nahi hai"
"intercaste se darr rahi ho?"
"haan"
"agar tumhe lagta hai ki wo tumhe khush rakhega,kabhi dhokha nahi dega,tumhari zindagi mein indradhanushi rang bhar dega to meri salaah yahi hai ki tum uss se shadi kar hi lo"
"per meri family?....aur fir log kya kahenge?"
"logo ki baat to tum rahne hi do sis,samaj hamare dukh ko enjoy karta hai,humein khushi dene ki koshish nahi karta.Humara sukh dekhkar samaj jalega,ho sakta hai kabhi kuch sunne ko bhi mil jaye,per fir kitne din? Jab ek din samaj dekhega ki uski baato ka tum per koi asar nahi ho raha hai to wah bolna chhod dega,aur rahi baat tumhari family ki,toh yaha bhi wahi baat hai..bol kar ya tumpe naraz ho ke wo tumhara kya bigaad lenge? Tumhari itni hi chinta thi toh tumse chhoti Nimmi ki shadi kaise fix kiya unhone tumse pahle? Sunne me tumko bura lag sakta hai per sachchai yahi hai ki tumhar parivar ko tumhari koi parwah hai hi nahi..Maa sauteli hain tumhari,wah to durvyawahar karengi hi,per papa tumhare? Wah to apne hain na? fir kyu tumhe chhod diya? Tumhari shadi ke bare me kyu nahi socha unhone? Khair! wah nahi sochte to na sahi,but as your frend and as your brother main sochta hu tumhare bare mein,,isliye main yahi suggest karunga ki tum apne bare me socho.Yah tumhara adhikar hai,apni zindagi sawarne ka tumhe bhi to haq hai!!"

"shayad tum sahi kah rahe ho"
"shayad nahi,cent percent main sahi kah raha hu.Maine kya tumhe kabhi galat advise diya hai?"
"nahi,abhi tak to nahi,isiliye to tum mere legal advisor ho"
"Achcha wo mahan hasti hain kaun,jinhe apse shadi karne ka mann hua hai?"
"wo..."
"kahin Siddhant to nahi??"
"haan wahi.."
"Fir to tum uska haath thaam hi lo.aaj uske aane ki khabar sunati tumhari aawaz me maine khushi mahsoos ki hai to socho sis jab tum uske sath rahogi tab kitni khush rahogi? main tumhe hamesha happy dekhna chahta hoon,iss opportunity ko miss mat karna,pyar zindagi me sirf ek baar aata hai ,ho sakta hai tumhara Mr.Right yahi ho!"
"per main uss se pyar karti hi nahi,uske bare me kabhi waisa socha hi nahi"Aru boli to Aashu hans diya.
"Jaanti ho tumhari problem kya hai? tum kalpana ki duniya me rahna jyada pasand karti ho..sachchai kalpana se alag hoti hai sis aur usse tumhe sweekar karna hoga.Mills n Boons padh padhkar tumhara dimag kharab ho gaya hai.Waisa romance,waisa pyar,wo passion real life mein possible nahi hai.Aur fir aisa thode hi hai ki duniya me sabhi love marriage hi karte hain? Pata hai meri dadi kaha karti thi ki shadi uss se karni chahiye jo apse pyar kare,na ki uss se jisse apko pyar hai... Mana ki Siddhant ka pahle tumhari cousin se affair tha.Per ab to wah purani baat ho gayi hai.Agar aaj wo tumse shadi karna chahta hai to iska matlab yahi hai ki waj tumhare liye apne mann me anurag rakhta hai,Tumhari cousin to ab aane se rahi...waise ek baat aur kahoon? bura nahi manogi na?"
"kaho"
"Siddhant ke sath tumhari purani dosti hai,tum dono school time ke frens ho na?"
"haan"
"beech me tumhari cousin scene me aa gayi,Siddhant ka uske sath affair mujhe pyar cum infatuation jyada lagta hai...mujhe to lagta hai tum dono shuru se hi ek dusre ke pyar me the,bas uss pyar ko samajh nahi paye.Aj Siddhant samajh bhi gaya hai per tum admit karne se avoid kar rahi ho"
"what rubbish! main uss se pyar nahi karti"
"Achcha theek hai,nahi karti,per uss se shadi ke baad karogi,I m sure"
"toh main usse haan kar du?"
"sure,aur shadi kab kar rhi ho,mujhe zarur batana"
"court marriage hi hogi jab bhi ho"
"kyun? uski family ready nahi hai kya? waise parents ko court inform kar hi deti hai.."
"wah manage ho jayega"
"ok thik hai dhyan rakhna,registered hi karna,mandir me nahi"
"kyu?"
"for your safety..aur kya?"

Aashu se baat karne ke baad Aru ko achcha mahsoos hua.Uthkar din ke bache khaane ko fridge se nikal ke garm kiya aur khaane baith gayi.Itna bura bhi nahi bana tha,Khaate khaate apni zindagi ke safar ke baare me sochne lagi.


END OF PART-3